Беларуска зняла мультфільм, які пакажуць на кінафэстывалі Berlinale

Аніматарка з Беларусі Алёна Баранава зняла мультфільм пад загалоўкам «Лісток», які пакажуць на прэстыжным міжнародным кінафэстывалі Berlinale ў сталіцы Гераманіі 25 лютага, паведамляе svaboda.org са спасылкай на impuls.cz.

Фільм створаны Барановай у якасці магістарскай дысертацыі на факультэце мультымедыйных камунікацый Універсітэту імя Томаша Баці ў Зліне (Чэхія).

Сюжэт фільму вельмі просты. Вялізны матрос атрымлівае ад маленькай дзяўчынкі прыгожы восеньскі лісток, які нагадвае яму пра дом. Раптам ён пачынае задумвацца, колькі часу ён не быў дома і не бачыў бацькоў, пагружаецца ва ўспаміны. Гэта падштурхоўвае яго як мага хутчэй наведаць бацькоўскі дом.

«Я іншаземка, якая жыве ў Чэхіі. Я падсвядома занепакоеная доляй бацькоў, якіх я не бачу так часта, як хацелася б», — патлумачыла імпульс да стварэння мультфільму Алёна.